Центарот за поддршка на НВО Гевгелија на 16 јуни во Кавадарци организираше група од  40 претставници од регионот што го покрива Центарот  за учество на Конференција на тема:

„Вино – Европски искуства и македонски можности“. Конференцијата ја отворија грчкиот амбасадор во Македонија, Александра Пападопулу, и словачкиот в.д. амбасадор Роберт Кирнаг кои зборуваа за приоритетите на нивните држави во надворешната политика и проширувањето на ЕУ. За вината со географско потекло зборуваше Алфонсо Чакон енолог од Мендтрида Шпанија кој нагласи дека за производство на квалитетно вино потребна е целосна контрола на производствениот процес и потенцира дека Македонија треба да се најде на меѓународната карта на виното преку организирање настани поврзани со виното. Јанис Бутарис, познат вино-производител од Науса, Грција се осврна на производството на квалитетни вина од традиционални сорти. Бутарис порача дека македонските винари мора да изградат препознатливи автохтони сорти кои треба да се наметнат со својот квалитет.

Новите трендови во македонската винска индустрија ги претстави Михаил Петков од Земјоделскиот факултет и член на Европското винско витештво. Петков констатираше дека македонските винарии, особено оние помалите, се повеќе се ориентираат кон производството на квалитетни сорти вино, кои иако во мали количини успеваат како флаширано вино да го извезат во ЕУ. Петков порача дека во денешно време единствено со квалитетот може да се победат големите производители.
Серкос Харутунијан од Земјоделскиот факултет во Атина го претстави проектот за управување со отпадот од винската индустрија „Дионис“. Со овој проект, не само што се заштитува животната средина, туку преку хемиски процеси од винскиот отпад се создаваат нови производи кои носат дополнителни приходи. Харутунијан нагласи дека со преработка на винскиот отпад може да се добие органско ѓубриво, суровини за козметичката индустрија, како и високонутриционистички додатоци за сточна храна.
Александар Николовски од Секретаријатот за европски прашања ги нагласи новите предизвици на македонското вино, како што се зголемувањето на флашираното производство, одредувањето на географското потекло и зајакнувањето на домашните административни капацитети.

Во рамки на проектот „Акција за Европа“ на 14 јуни во Кочани беше одржана четвртата конференција на тема: „Енергетска ефикасност – европски искуства и македонски перспективи“

На конференцијата зборуваше независниот експерт и долгогодишен претседател на Регулаторната комисија за енергетика, Славе Ивановски, зборувајќи за енергетската политика на Македонија и што е она што треба да се направи, ги нагласи недостатоците на законските одредби кои се однесуваат на енергетиката и енергетската ефикасност. Според него, освен законските, постојат и административни пречки за постигнување енергетска ефикасност во Македонија, односно високиот паричен надоместок потребен за трансформација на земјоделското во индустриско земјиште, како и лошите технички можности односно слабата напонска мрежа која не може да издржи повеќе производители на струја.

Претставникот на германската амбасада Соња Боне и претставникот на Мисијата на ЕУ, Даниел Александар Шрот, зборувајќи за приоритетите на ЕУ во доменот на енергетската политика “ истакнаа дека ЕУ го поддржува развојот на обновливите извори на енергија и дека Стратегијата 2020 на ЕУ предвидува обновливите извори на енергија да учествуваат со 20 отсто во вкупното производство на електрична енергија.

Габриела Костова, од Европскиот информативен и иновативен центар во Македонија (ИИЦМ), во делот посветен на европските фондови за поддршка на енергетските проекти, ги запозна гостите со можноста за финансирање на проекти од европските програми за конкуренција и иновативност и 7-мата рамковна програма.

Соња Гушкова од Геотерма Кочани, пак, го претстави проектот за искористување на геотермалните води во добивањето на топлинска енергија како практичен пример за искористуваење на обновливите извори на енергија.

На конференцијата имаше  учесници од цела Македонија и присуствуваа 10 претставници од регионот што го покрива Центарот за поддршка на НВО Гевгелија.

Во рамки на проектот „Акција за Европа“ на 11 јуни во Срумица беше одржана третата конференција на тема: „Земјоделство – европски искуства и македонски перспективи“

Конференцијата ја отворија Словачкиот амбасадор во Македонија, Роберт Кирнаг кој зборуваше за приоритетите на неговата држава во надворешната политика и проширувањето на ЕУ.

Јан Баршвари, експерт од Словачка, ги пренесе искуствата од проектот за поддршка на подготовката на ИПАРД во неговата земја: „Многу е важно што започнавте со искористување на средствата од ИПАРД програмата пред да ги започнете преговорите. Во преговарачкиот процес, Словачка беше корисник на САПАРД програмата од која добивавме по 26,5 милиони евра годишно. Покрај тоа, користевме и средства од други програми, а денес, преку европските фондови добиваме повеќе од 250 милиони евра“.

Иван Меккачион од Западен Корк, регион во Република Ирска истакна дека Западен Корк е долгогодишен корисник на програмата ЛИДЕР преку која станал препознатлив регионален бренд. Преку практични примери и живописна презентација, Меккачион го престави целокупниот тек на брендирањето на еден рурален регион: „Стратегијата за брендирање на еден регион мора да биде заснована врз природните ресурси, квалитетот на животната средина, но и на локалното знаење и вмрежувањето на невладините и земјоделските организации. Придобивките од брендирањето се доста значајни за целокупниот индустриски развој.“

Маргарита Делева, државен советник во Минстерството за замјоделство и водостопанство ги запозна гостите со процедурата за добивање финансиска подршка од министерството за земјоделство. Делева преку конкретни примери ги анализираше предностите од модернизацијата и диферзификацијата на производствените процеси.

Даниела Андонова од „Евро центар“, Свети Николе, го претстави проектот „Подобра апсорпција на еврофондовите за земјоделство“, кој се реализира од 2008 до 2010 година. Според Андонова и нејзиното искуство, главни пречки за успешни проекти кај македонските земјоделци се слабата заинтересираност за регистрација на земјоделци поединци или правни лица, како и немањето убранистички план во голем дел од руралните средини, со што се оневозможува апликацијата за субвенции.

На конференцијата имаше  учесници од цела Македонија и присуствуваа 30 претставници од регионот што го покрива Центарот за поддршка на НВО Гевгелија.

На 01 јуни 2010 година во траење од 10:00 часот до 17:00 часот  во просториите на Центар за поддршка на НВО-Гевгелија  Младинскиот клуб „БУМ“ организира работилница во рамки на проектот  „Слушнете го НАШИОТ ГЛАС“ финансиран од МОФ. Целта на работилницата беше средношколците да формираат структура на младинското тело и да изработат програма за работа и акционен план на дејствување на младинското тело. На работилницата присуствуваа 20 средношколци. Работилницата ја водеше г-дин Марио Вељковиќ.

     На 27 мај 2010 година со почеток во 13:00 часот во просториите на СОУ. “Јосиф Јосифовски” Младинскиот клуб „БУМ“ организира трибина на тема: „Активно учество на младите во процесот на донесување на одлуки и остварување на своите права“.Целта на трибината беше учесниците да бидат запознаени  и информирани со состојбата во училиштето во областа на почитување на правата на средношколците и нивно учество во процесот на донесување на одлуки. Воведен збор на трибината имаа г-ѓа Светлана Митровска, психологот во училиштето СОУ.„ Јосиф Јосифовски, г-дин Столе Ташков, професор во училиштето СОУ.„ Јосиф Јосифовски, г-ѓа Софија Кочева, професор во училиштето СОУ.„ Јосиф Јосифовски и г-дин Јане Заевски, претставник на Младински Образовен Форум –Скопје.

Модератор на трибината беше Кристина Попова, претставник на БУМ. На трибината беа присутни 50 учесници кои дискутираа за правата и обврските на средношколците, за однесувањето на одредени професори кон средношколците, за начинот на кој професорите им го пренесуваат знаењето на средношколците, за начините како средношколците и каде да се пожалат во случаи кои им се нарушени правата, на кој начин средношколците и учениците да соработуваат заедно, за воведувањето на екстерното оценување, за тоа дека 90% средношколците не учествуваат во процесот на донесување на одлуки и др.

Трибината ја организира Младинскиот клуб „БУМ“ во соработка со Младински Образовен Форум - Скопје (МОФ) и Центар за поддршка на НВО – Гевгелија во рамки на проектот „Слушнете го НАШИОТ ГЛАС“ финансиран од МОФ.

На 14 мај 2010 година со почеток во 12:00 часот во просториите на Центар за поддршка на НВО-Гевгелија, Младинскиот клуб „БУМ“ одржа прес-конференција по повод проектот „Слушнете го НАШИОТ ГЛАС“ поддржан и финансиран од Центар за поддршка на НВО и Младински Образовен Форум. На прес-конференцијата беше презентирана идејата за спроведување на овој проект, активностите што ќе се реализираат и резултатите што средношколците сакаат да ги постигнат преку овој тип на неформално образование.

Целта на проектот е  да се иницира активно учество на младите во процесот на донесување на одлуки и алармирање на проблемите и потребите на младите во СОУ. “Јосиф Јосифовски” – Гевгелија преку формирање на младинско тело и негова едукација. Проектот ќе се спроведува во месец мај 2010 година. Целна групa на проектот се средошколци од I до IV  од СОУ. “Јосиф Јосифовски”.

Центарот за поддршка на НВО Гевгелија во соработка со Младински образовен форум во деновите 7 и 8 мај организираше дводневна обука на тема: „Пропаганда и медиуми“ за членовите на младинскиот клуб „БУМ“. На обуката беа разработени повеќе елементи на медиумско претставување, нови медиуми, критичко размислување и медиумска пропаганда. Целта на обуката е запознавање на младите средношколци и стекнување повеќе знаења од областа на медиумите и комуникацијата. На обуката беа присутни 16 средношколци од Гевгелија. Обуката ја спроведоа Билјана Бејкова и Павлина Каранфилова од НВО Инфоцентар од Скопје. 

На ден 29.04.2010 година во просториите на Центарот за поддршка на невладини организации од Гевгелија се одржа работилница на тема: „Заштеда на електрична енергија во домаќинствата“. Работилницата ја организираше ЦП НВО Гевгелија во рамки на проектот „Гевгелија – енергетски ефикасна општина“ кој што се спроведува во партнерство со општина Гевгелија. Проектот е финансиски поддржан од Глобалниот еколошки фонд, Програма за мали грантови. Целта на работилницата беше учесниците да се стекнат со практични знаења за енергетската ефикасност и како да се штеди енергијата при секојдневна нејзина употреба во домаќинството. Работилницата беше наменета за средношколци и истите беа запознаени со можноста за искористување на алтернативните обновливи извори на енергија пред се сонцето и употребата на соларните панели за добивање топла вода кои што го заменуваат еден од најголемите потрошувачи во домаќинството бојлерот.. Беа присутни 40 седношколци од средните училишта од општините Гевгелија, Валандово и Богданци.

Работилницата ја спроведе Јован Драгановски, консултантот за енергетска ефикасност  од Здружението на граѓани Проактива од Скопје.

Во просториите на Центарот за поддршка на НВО – Гевгелија на ден 21.04.2010 година се одржа еднодневен семинар на тема „Промоција на Е-центар за поддршка на граѓански организации“. Обуката ја реализира тимот на проектот Техничка поддршка на граѓанските организации – ТАКСО-Македонска канцеларија финансирана од Европска Унија.

На семинарот присуствуваа претставници на 28 НВОи од општините Гевгелија, Валандово и Богданци. Присутните беа запознаени со проектот ТАКСО со услугите што НВОи можат да ги добијат од ТАКСО канцеларијата и со националната програма на ТАКСО проектот за градење капацитет.

Центарот за поддршка на НВО – Гевгелија и Младински образовен форум од Скопје во соработка со СОУ „Јосиф Јосифовски“ - Гевгелија со на 14 април 2010 година во просториите на училиштето организираа едукативна работилница на тема „Младите во акција“. Целта на работилницата е запознавање на младите од 16-22 години како да пристапат до европските фондови со проекти кои ќе овозможат соработка помеѓу младите од различни држави, патувања за размена на идеи, искуства, учење за различните култури, можности за стипендирање и волонтирање на младите во земјите на ЕУ. Европската унија за периодот 2007-2013 година за Македонија обезбеди 885 милиони евра за програмата „Младите во акција“.  На работилницата беа присутни 22 средношколкци и членови на Младинскиот клуб – БУМ. Присутните преку интерактивни вежби се запознаа со следните програми: 1) Комениус – програма за предучилишно и основно образование; 2) Леонардо Де Винчи – програма за средно стручно образование; 3) Грундтвиг – програма за образование на возрасните и 4) Еразмус – програма за високо образование. Работилницата е една од активностите во рамки на проектот „Акција за Европа“ кој се реализира на национално ниво и финансиски поддржан е од ФИООМ.